「起來，拿你的褥子走吧！」

一日，兩位老人家蹣跚地步入診室，女的參扶著男的，是一對夫婦無疑。

病：醫生早…(標準的普通話，卷脷嗰隻)

醫：早啊！(用我最普通的普通話回話，下同。從步姿，一眼就睇得出佢條腰真係好痛)看來你的腰給弄傷了，很疼吧？病：對啊，昨天弄的。

醫：(禮貌咁指吓張椅，示意佢坐低，但佢就係企係度唔郁，面有苦貌)痛得利害，坐也坐不下吧？

病：(點吓頭)是的。醫：(三個人就咁係狹窄嘅診室，好似三枝竹咁企咗係度睇病)怎弄的？

病：不就是昨天抱起孫兒，然後舉起來…(同時兩隻手走晒樣咁示範點做，老太太係呢個時候加把咀，數多佢兩嘢)

醫：孫兒多重？病：19斤…醫：那真的很重吖(其實當時我跟本對於19斤即係有幾重無咩概念。但既然會整傷腰，咁就係過重啦…並開始檢查患處)檢查時我覺得自己好似係度拆禮物咁…首先拉高件衫，之後掹底條褲，見到一個好似舉重選手用嘅腰封。除咗個腰封，又見到一張4R相大細嘅藥膏。搣開藥膏，先見到患處…係咪好似拆禮物咁呢？

病：前幾天還好的，還跟明星足球隊踢球…我以前踢八一隊的。

醫：明星隊…譚詠麟吧？

病：對呀！(於是又從褲袋拿出個電話，開始掃。今次我醒咗，唔會天真咁以為係睇X-光片或報告，並預備好合乎期望嘅表情)

朋友，如果你開始向一些陌生人興奮地掃電話，比佢睇一D同佢亳無關係嘅相嘅時候，你嘅實際或心理年齡應該無70，都起碼有60！…信我，呢個係我即將係學術期刊發表嘅人類學調查報告嘅結果。

經過一輪規範嘅問證及檢查，就帶個病人入治療室。見他爬上床訓底嘅一連串動作，加埋痛苦嘅表情，真係我見猶憐…

一輪約半小時嘅針推治療，觸摸病人先前如板硬嘅腰肌，現在回軟了不少。

病：現在好很多啦，沒那麼疼，謝謝！(他的面容也實在地反映出那不是客套話)

醫：沒謝(待他整理好衣履，我指指放在枕邊嘅膏藥貼及腰封)，要貼上跟帶上這個嗎？

病：不用啦，現在輕鬆好多啦(於是一手攞起個腰封，迅步咁行出治療室)

望住佢右手攞住個腰封行走嘅背影，當時我腦海突然浮起《聖經》裡面嘅一個畫面同耶穌嘅一句話：「起來，拿你的褥子走吧！」一個畫面加埋一句說話…WOW！真係有D神蹟feel…但我係攪咗半粒鐘，又推，又搓，又吉，又電…先有咁嘅效果，我更加無膽話：「起來，拿你的腰封走吧！」反而問要唔要帶返…

《聖經》記載耶穌一句話就攪掂咗一個病咗38年行動不便的男子，呢D先係堅神蹟！