人生真奇妙….

一日，一位已屆從心所欲之年，卻仍神清腰拔的阿伯來求診。

病：早晨阿醫師，我來睇膝頭哥痛嘅(用手指指患處)…係舊患嚟嘅…(並從褲袋拿出他的手機…)

醫：(點頭表示明白…心想應該是要給甚麼X-光片或報告看看吧，於是就把頭湊近…)

映入眼簾的，果然是黑白照片，但不是甚麼X-光片或報告，而是並排著幾位穿著70年代衣飾的健壯男子的黑白照。我一眼便認得其中一位…

病：(指指在照片正中的那一位)你認得呢位嗎？

醫：(高興地)認得…李小龍吖嘛！

病：(很是高興)就指指照片上另一個人，呢個就係我…(很有滿足感的語調) (老實講我無法將一個相差50幾年，其中一個又帶著口罩的兩幅面孔連在一起…心諗你話係就係啦。)

醫：(驚訝貌)係呀，你嗰時都好後生靚仔，又大隻噃(努力咁比compliment…但佢好似聽唔到…side晒我D skill)

病：我隻腳就係同李小龍拍戲對打時比佢踢傷嘅…(之後又係佢去片嘅時候…病人一路掃(掃咗十幾張)，一路講佢同李小龍的種種…甚麼Way of the Dragon…咁就攪咗差唔成十分鐘都未開始睇病)

醫：(一路點頭)哦，哦，哦！(但其實我的目光已放咗係佢嘅痛腳上)

心諗…嘩，人生真奇妙！一個未滿月嘅醫師，在治療一個被譽為「國際著名華裔武術家」、「截拳道創始人」的大人物李小龍所造成的陳傷。時空交錯…手觸碰著患處，腦海想著李小龍那上中下三路無影腳，好象還感受到那種如疾風嘅勁度(我承認有D誇張)，那傷患明顯是下路腿法造成的。

想不到一個已離世將近半世紀的傳奇人物，我會在這個時刻，以這種方式，藉著一個傷患，跟他產生交集，治療由他造成的傷患…人生係咪真係好奇妙哩！

PS. 在這崇尚fact-check嘅年代，我已核實了老伯的身份，他沒有“崑”我。